អតិថិជនជាទីគោរព

ពិភពលោកឆ្នាំ២០២៣នេះ ត្រូវបានគេសង្កេតឃើញថាបញ្ហាប្រឈមនៅតែបន្តកើនឡើងគួរឲ្យកត់សម្គាល់។ ខណៈដែលសេដ្ឋកិច្ចអាមេរិកកំពុងបង្ហាញភាពធន់របស់ខ្លួននៅក្នុងវិស័យចំនួន ​ បញ្ហាពិភពលោកវិញនៅតែបន្តមានវត្តមានជាលំដាប់ ទាំងដែលស្ថានភាពសេដ្ឋកិច្ចពិភពលោកកំពុងស្ថិតក្នុងលក្ខខណ្ឌងើបឡើងវិញក្រោយពីជំងឺរាតត្បាត​កូវីត១៩ ។ បញ្ហាប្រឈមទាំងនេះរួមមាន ជម្លោះអូសបន្លាយនៅបណ្តាប្រទេសមជ្ឈិមបូព៌ា និងអ៊ុយក្រែន ដែលបណ្តាលឲ្យមានភាពតានតឹងនូវភូមិសាស្ត្រនយោបាយ ជាហេតុធ្វើឲ្យមានការកើនឡើងនៃតម្លៃប្រេងឥន្ធនៈ និងម្ហូបអាហារជាសកល។ មួយវិញទៀត វិបត្តិអចលនទ្រព្យនៅក្នុងប្រទេសចិនក៏កំពុងលេចឡើង រួមជាមួយនឹងការធ្លាក់ចុះនៃតម្រូវការប្រើប្រាស់ក្នុងស្រុក។ ស្របពេលជាមួយគ្នានេះដែរ អត្រាការប្រាក់គោលវិញ មានការកើនឡើងជាបន្តបន្ទាប់ ក្រោយពីធនាគារកណ្តាលរបស់បណ្តាប្រទេសមួយចំនួនបានព្យាយាម ទប់ស្កាត់អតិផរណា តាមរយៈគោលនយោបាយរឹតបន្តឹងរូបិយវត្ថុរបស់ខ្លួន។

ទោះបីជាសេដ្ឋកិច្ចពិភពលោកហាក់មានការជាប់គាំងក្នុងឆ្នាំ២០២៣នេះ សេដ្ឋកិច្ចកម្ពុជានៅបន្តមានការកើនឡើងប្រមាណ ៥,៥% ពោលគឺកើនឡើងពី ៥,៣% ដែលបានកត់ត្រាក្នុងឆ្នាំ២០២២។ លទ្ធផលនេះចម្បងបានមកពី ការពង្រីកវិស័យទេសចរណ៍ ការបង្កើនល្បឿននៃការនាំចេញទំនិញកម្មន្តសាលប្រភេទមិនមែនកាត់ដេរ (GTF) រួមជាមួយនឹងការកើនឡើងនៃតម្រូវការប្រើប្រាស់ក្នុងស្រុក។ ទោះជាយ៉ាងណាក៏ដោយ បើយោងទៅតាមធនាគារជាតិនៃកម្ពុជា សមិទ្ធផលសម្រេចបានទាំងនេះហាក់នៅមានកម្រិត បើធៀបទៅនឹងការព្យាករណ៍កាលពីឆ្នាំកន្លងទៅដែលមានកំណើនរហូតដល់​៦% ដោយសារការថយចុះក្នុងការនាំចេញនូវផលិតផលកម្មន្តសាល និងវាយនភណ្ឌ ឧស្សាហកម្មសំណង់អចលនទ្រព្យហាក់មានភាពរាំងស្ទះ និង វិស័យកសិកម្មក៏ជួបការលំបាកដូចគ្នាដែរ។

បើក្រឡេកទៅមើលវិស័យធនាគារនិងហិរញ្ញវត្ថុកម្ពុជាវិញ យើងនៅតែបន្តរឹងមាំ និងធន់ ដោយបម្រើជាកម្លាំងចលករក្នុងការគាំទ្រសកម្មភាពសេដ្ឋកិច្ច។ យ៉ាងណាមិញ ឱនភាពនៃវិស័យមួយចំនួនបានបណ្តាលឱ្យមានការថមថយនៃកំណើនឥណទានក្នុងឆ្នាំ ២០២៣ ប្រមាណ ៤,៨% ដែលជាអត្រាទាបបំផុតក្នុងរយៈពេលពីរទសវត្សរ៍ចុងក្រោយនេះ ខណៈដែលឥណទានមិនដំណើរការមាននិន្នាការកើនដល់ ៥,៤% ដោយសារតែការបញ្ចប់នៃការរៀបចំឥណទានឡើងវិញ។

ក្នុងអំឡុងពេលកន្លងមកនេះ ធនាគារស៊ិនហានខេមបូឌា នៅតែបន្តបោះជំហានឆ្ពោះទៅមុខ។ គិតត្រឹមខែធ្នូ ឆ្នាំ ២០២៣ ឥណទានដុលសរុបរបស់ធនាគារ​ (Total Loan Gross) បានកើនដល់​ ៧០២ លានដុល្លារអាមេរិក ដែលកើនឡើងពីឆ្នាំមុនដែលមានចំនួនត្រឹម ៦៩១លានដុល្លារអាមេរិក។ សមតុល្យប្រាក់បញ្ញើបានកើនឡើងចំនួន ៩២ លានដុល្លារអាមេរិកដែលបានកើន ១៩% ធៀបកាលពីឆ្នាំ ២០២២។ កំណើនទាំងអស់នេះគឺបានឆ្លុះបញ្ចាំងពី សេចក្តីទុកចិត្តពីអតិថិជនស្មោះត្រង់របស់យើង។ ដូច្នេះហើយនៅឆ្នាំ២០២៣នេះ យើងបានបន្ថែមដើមទុនចំនួន ១០០លានដុល្លារអាមេរិក ដែលធ្វើឲ្យសមតុល្យមូលធនសរុបរបស់យើងឡើងដល់ ២៦៥ លានដុល្លារអាមេរិក។ លើសពីនេះ យើងបានបង្កើតផលិតផលប្រកួតប្រជែងថ្មីដូចជា "ប្រាក់កម្ចីសាមញ្ញ" (Simple Loan) និង"ការផ្ទេរប្រាក់ទៅក្រៅប្រទេស​ភ្លាមៗ" (Real Time Oversee Remittance) ដើម្បីសម្រួល និងពន្លឿនដំណើរប្រតិបត្តិការដល់អតិថិជន ។ ពិសេសជាងនេះទៅទៀត ដើម្បីឲ្យអតិថិជនបានទទួលយកនូវបទពិសោធន៍ប្រើប្រាស់កាន់តែងាយស្រួលជាងមុន ធនាគារយើងបានធ្វើបច្ចុប្បន្នភាពលើ SOL ម៉ូបាលអេប​ (SOL Mobile App) របស់យើងទៅ 3.0 បន្ថែមរួមជាមួយរចនាបទថ្មី បទពិសោធន៍ប្រើប្រាស់ថ្មី និងមានបន្ថែមនូវមុខងារទូទាត់សម្រាប់ប្រើប្រាស់ជាច្រើនផ្សេងៗទៀត។ ជាមួយគ្នានេះ យើងបានផ្លាស់ប្តូរទីតាំង សាខាអូឡាំពិកទៅសាខាចោមចៅស្ថិតនៅខណ្ឌពោធិ៍សែនជ័យ និងបានបើកសាខាថ្មីនៅខណ្ឌឫស្សីកែវ ដែលធ្វើឲ្យធនាគារមានចំនួនសរុប ១៥សាខា ដើម្បីឲ្យអតិថិជនរបស់យើងអាចទៅទទួលសេវាកម្មរបស់ធនាគារនៅគ្រប់ទីតាំងដែលអតិថិជនពេញចិត្ត។​

លើសពីនេះ ធនាគារស៊ិនហានខេមបូឌា បានបន្តចូលរួមចំណែកក្នុងសកម្មភាពទំនួលខុសត្រូវរបស់សាជីវកម្មចំពោះសង្គម តាមរយៈការផ្តល់ជំនួយទៅទីដែលមានតម្រូវការ។ ជាក់ស្តែង កន្លងមកយើងបានផ្តល់អាហារូបករណ៍ជូនសិស្សនិស្សិតជាច្រើនកន្លែង សម្រាប់ថ្នាក់ភាសាកូរ៉េ និងថ្នាក់វិទ្យាសាស្ត្រកុំព្យូទ័រ នៅសកលវិទ្យាល័យភូមិន្ទភ្នំពេញ (RUPP) និងមជ្ឃមណ្ឌលសហប្រតិបត្តិការកម្ពុជា-កូរ៉េ (CKCC)។ យើងបានបង្កើតថ្នាក់កុំព្យូទ័រស៊ិនហាន (Shinhan Computer Class) សម្រាប់បង្រៀន ទៅដល់ កុមារនៅក្នុងក្រុមចម្រៀងកុមារRaonjena ព្រមទាំងបានបរិច្ចាគកុំព្យូទ័រទៅដល់ពួកគេដើម្បីសម្រួលក្នុងការ​សិក្សាផងដែរ។ បន្ថែមពីនេះ យើងក៏បានសម្រេចគម្រោងថ្នាក់អប់រំហិរញ្ញវត្ថុឈ្លាសវៃសម្រាប់ស្ត្រីមេផ្ទះជាង៤០នាក់បានចូលរួម។​ សកម្មភាពទាំងអស់នេះបានចូលរូមចំណែកក្នុងការអភិវឌ្ឍន៍សង្គម ដែលជាទំនួលខុសត្រូវរបស់សាជីវកម្មចំពោះសង្គម និងនិរន្តរភាព។​

ក្នុង​នាម​ជា​ធនាគារ​អន្តរជាតិនៅក្នុង​ប្រទេស​កម្ពុជា ទំនុកចិត្ត​របស់អតិថិជន និងការជឿជាក់លើអ្វីដែលយើងធ្វើ ​គឺ​ជា​អ្វី​ដែល​ធ្វើ​ឱ្យ​យើង​បន្តនៅ​ទី​នេះ​រហូត​ដល់​សព្វ​ថ្ងៃ។ យើងសូមអរគុណជាអនេក ចំពោះការគាំទ្រ និងការជឿទុកចិត្តរបស់អតិថិជនមកលើយើងសម្រាប់រយៈពេល​ ១៦ ឆ្នាំ កន្លងមកនេះ។ ក្នុងនាមជំនួសឲ្យ ធនាគារស៊ិនហានខេមបូឌា និងសមាជិកធនាគារទាំងមូល យើងមានមោទនភាពក្នុងការរួមជាចំណែកតម្រង់ទិស និងនាំមកនូវចំណេះដឹងហិរញ្ញវត្ថុចាំបាច់ដែលអនុញ្ញាតឲ្យបុគ្គល និងអាជីវកម្មបុគ្គល មានសមត្ថភាពក្នុងការគ្រប់គ្រងហិរញ្ញវត្ថុរបស់ពួកគេប្រកបដោយប្រសិទ្ធភាព និងភាពឆ្លាតវៃ។ "យើងជឿថា ហិរញ្ញវត្ថុគួរតែមានភាពងាយស្រួល សុវត្ថិភាព និងច្នៃប្រឌិតជាងមុន។"

យើងខ្ញុំសូមថ្លែងអំណរគុណ និងសំដែងនូវការដឹងគុណយ៉ាងជ្រាលជ្រៅសម្រាប់ការបន្តជឿជាក់ និងគាំទ្ររបស់អតិថិជន មកលើធនាគារស៊ិនហានខេមបូឌាកន្លងមក។ នៅក្នុងឆ្នាំខាងមុខ យើងខ្ញុំនឹងទន្ទឹងចង់ឃើញនូវសមិទ្ធផលដែលធនាគារ និងអតិថិជនររបស់យើងនឹងសម្រេចបានរួមគ្នា។​ នៅឆ្នាំ ២០២៤ នេះ យើងសន្យាថានឹងឆ្ពោះទៅ "លើសពីភាពល្អ" ជំនួសដោយពាក្យ "អស្ចារ្យ" ។ ចូលរួមចែករំលែករឿងដ៏អស្ចារ្យរបស់ ធនាគារស៊ិនហានខេមបូឌាទាំងអស់គ្នា។

កម្ពុជាអស្ចារ្យ! ធនាគារស៊ិនហានខេមបូឌាអស្ចារ្យ! រឿងដ៏អស្ចារ្យ!

សូមអរគុណ

ធនាគារស៊ិនហាន (ខេមបូឌា)ម.ក
ប្រធាននាយកប្រតិបត្តិ
Mr. Park Hee Jin